فلک سے آج شور نعرہ مستانہ آتا ہے

فلک سے آج شور نعرہ مستانہ آتا ہے
کوئی مے نوش بادل جانب میخانہ آتا ہے

لحاظ خاطر احباب دیرینہ ہے اے زاہد
چلوں کیا سوئے مسجد راہ میں میخانہ آتا ہے

محبت کے علاوہ کچھ نہ پوچھ اے داور حشر
مجھے تو بس یہی قصہ یہی افسانہ آتا ہے

یہ کس کی جستجو میں رشک مجنوں بن گئی لیلی
یہ کیا آج محمل جانب ویرانہ آتا ہے

حفیظ اس بزم رنداں میں مجھے بھی لے چلو اک دن
بقدر ظرف گردش میں جہاں پیمانہ آتا ہے
حفیظ جالندھری